政壇：搞搞政：鄧忍光調職陷膠着
領導香港電台嘅廣播處處長鄧忍光已做咗接近四年，按政務官三至四年一調嘅慣例，預計佢即將調職。但有口痕友就作出分析，其他處長級位置暫時未有空缺，而創新及科技局又遲遲未能夠成功開局，搞到政府依家都好頭痕點樣安置佢好。
（設計圖片及對白）
離港台仍留兩「蘇州屎」
點解佢仲未調任？據聞有兩個原因，首要原因就係政府舊年九月開始公開招聘廣播處處長，但至今仲未公布人選，即係未有人接替佢。另一原因就係政府仲未諗掂點調職，因為佢依家係D6級（首長級第六級）政務官，同級職位就係部門處長，亦有可能佢係署任D8級嘅常秘。之但係最近一次調任康文署署長就冇佢份，創科局亦「拉布」至今，仍未能開局空出常秘位，所以似乎要等有處長或常秘退任先有轉機。話口未完，近日有傳創新及科技署署長王勞珍今年退休，令鄧調職有番啲曙光。
不過，就算鄧忍光離去，港台仍有一堆「蘇州屎」留低畀新處長執手尾，當中包括兩件大事。首個係亞視不獲續牌，港台要「臨危受命」接手亞視兩條模擬頻譜，據聞港台已畀咗商務及經濟發展局三個建議，分別係買入亞視現有器材及發射站、租用無綫器材或自行購買器材，預算以千萬元計。港台就梗係想買入或租用器材啦，起碼省時省力，但買唔買得切，人哋租唔租畀你，又係另一回事。
另一樣更重要嘅，就係港台計劃興建嘅將軍澳新大樓將捲土重來。立法會工務小組委員會舊年否決新大樓撥款，當時議員表明要新大樓造價「減磅」先可以再考慮。據聞，港台仲未諗到刪減邊個部門，其中有考慮過新聞部可以放喺市區，或將舊片庫放喺其他地方。一日未決定，一日建築署都仲未可以重畫圖則，所以內部預計最快要年底先搞得掂。
