有「頭箍小姐」之稱嘅財經事務及庫務局前常任秘書長區璟智喺舊年十二月退休，點知退休之後仲忙過返工，除咗一星期去一次佢擔任會長嘅協青社處理文件之外，仲開始學打高爾夫球，有時更加要做「跟得夫人」陪老公周圍公幹。不過，幸福嘅退休生活，原來都有啲小挫折。

撞車又傷腳，區璟智退休之後嘅生活仲忙過返工。（資料圖片）

原來區璟智早兩星期，一日之內整傷腳兼撞爛架私家車。佢話當日打完高爾夫球，一唔小心就屈親腳趾，本來以為冇乜嘢事，但去東區醫院做例行檢查時，醫生話佢可能有骨折，要去急症室診治。點知禍不單行，當佢喺急症室等緊醫生時，司機就突然打電話畀佢，話佢架房車撞咗燈柱，區璟智惟有一拐一拐去視察「意外現場」，好在無撞傷任何人，但維修費真係有排計。

雖然撞車又傷腳，但都無損區璟智嘅心情，佢更加大讚東區醫院醫生服務周到，當日只係等咗四小時，又照Ｘ光，又整咗隻鞋一樣大嘅腳套保護腳趾，仲要只係收一百元，真係物超所值。唔好以為要着腳套，就會令區璟智乖乖定下來，佢竟然帶住腳套去北京旅行。唔通佢近得青年人多，感染埋佢哋「天不怕、地不怕」嘅精神？

第一手消息請下載on.cc東網iPhone/iPad/Android/Windows Phone Apps