政壇：團體搞聯署籲勿加車稅
為咗紓緩道路交通擠塞，政府原則上接納交通諮詢委員會提出，提高私家車首次登記稅同牌費嘅建議，據知加幅或高達八成，以控制社會的車輛增長幅度，預計今年下半年落實，但就惹起公眾不滿。民間團體107動力尋日喺灣仔發起簽名行動，要求政府擱置增加私家車首次登記稅同牌費，並全面檢討全港泊車配套，仲建議參考外國多層停車場及地下停車場嘅例子，為本港各區大幅增加車位。
有團體尋日喺灣仔發起簽名行動，抗議政府擬增加車稅。（107動力提供）
交諮會喺舊年底提出十二項建議，以解決本港道路擠塞問題，包括建議增加咪錶泊車位收費、提高私家車首次登記稅同牌費，以及增加違例泊車定額罰款等。107動力召集人何民傑尋日話，導致交通擠塞嘅主因，在於本港多區欠缺足夠泊車位，稱現時全港僅不足一萬八千個路邊咪錶位，政府多層停車場車位亦得八千個，僅佔全港六十三萬架私家車嘅百分之四。佢批評政府喺規劃時冇全面完整地設計同善用空間，導致個別地區嘅泊車位嚴重不足，依家竟計劃透過加重稅懲罰車主，咁樣做對車主好唔公平。
