政壇：張明敏再轟議會混亂
喺立法會早前表決政改方案時，建制派議員突然離場「甩轆」，令到政改方案喺八票支持、二十八票反對下遭否決後，建制派議員解畫話因為要「等埋發叔」返嚟投票，跟住向公眾道歉，但隨着建制派同全國人大代表嘅WhatsApp群組絕密對話內容相繼曝光，令公眾嘩然。雖然建制派話唔會為群組對話外洩「捉鬼」，但事件仍未平息，餘波未了。
（設計圖片及對白）
對話曝光 顏寶鈴急耍冧
話說喺港區全國人大嘅WhatsApp群組絕密對話中，多名人大對事件感到震驚，亦有人大批評建制派甩轆事件荒謬絕倫，其中兩名人大代表顏寶鈴同張明敏更先後以「垃圾議員」、「垃圾議會」狠批建制派議員同立法會。
喺群組對話曝光後，顏寶鈴前日就喺報章撰文，話自己當時只係一時衝動、語氣過激，已經同班議員道歉，佢仲話日後會謹言慎行，不斷鞭策自己咁話。之不過，有「愛國歌手」稱號嘅張明敏就企硬，不但無意就其言論道歉，尋日再度開火炮轟目前議會內部混亂，認真火氣十足。
張明敏尋日出席七一活動時，再次被問及建制派就政改「甩轆」一事，指感到「好可惜、好傷心」，認為此事明顯蝦碌，但強調主要責任在於投反對票嘅泛民主派議員身上，希望社會各方重整旗鼓，又斥責外洩建制派WhatsApp群組對話內容嘅人士「好無道德」。
可能係意猶未盡，不吐不快嘅關係，張明敏其後繼續發炮，再批評現時議會內部混亂，直指議員未能為市民福祉謀福利，拖慢民生、經濟發展，又舉例指立法會財務委員會會議上周審議十一項民生議程，僅能通過兩項，認為議員要為此作出反思喎。
