香港郵政佗衰家 醜聞不斷鑊鑊甘

香港郵政經營不善，業績年年見紅，淨係上個財政年度已經虧蝕過億元。生意淡薄，無所事事，卒之搞到郵局執完一間又一間，唔執嘅都要縮短服務時間。本來，生意差工作量減少，裁減人手、開源節流至係正路，最奇係香港郵政員工總數居然維持不變，浪費公帑養懶蛇都算嘞，超時補水每年更加高達兩億元，當正納稅人係提款機，問你點頂！

係咁嘅，日前本報踢爆二十幾名郵政員工集體蛇王，返工期間將郵政車泊埋陰涼處，有人吞泡，有人瞓大覺，有人唔知做乜，到收工時間至扮做嘢，然後呈報超時工作，擺明呃補水，管理層居然照批可也，話唔係打龍通都冇人信喇。「東方報業民意調查」發現，近四成受訪者指香港郵政監管不力；三成認為騙取及濫發津貼問題嚴重；擔心問題只係冰山一角嘅達兩成。

講真，如果私人企業出現冗員，早炒魷喇。如果有人呃埋津貼，補水高達半份人工咁多，更加要向廉署舉報貪污添喇！難怪四成四受訪者指摘香港郵政無王管，變相縱容；三成二人要求審計署介入調查；一成二人直指不合理。

話時話，香港郵政既然係醜聞王，又點止蛇王呃補水咁簡單吖。身為郵政唔係使命必達，反而頻頻「失信於民」，真係醜死怪！遠嘅唔提，淨係舊年就遺失本地及海外郵件七千三百幾件，賠償金額超過二百萬元，納稅人真係多得呢班庸官唔少咯。

一句講晒，香港郵政沒有最醜，只有更醜，除咗反映本身管理亂龍，亦暴露港府官官相護，養癰遺患。審計署多年前曾發表報告批評郵政經營不善，點知當局闊佬懶理，致使問題持續惡化。對於香港郵政擇惡固執，屢爆醜聞，三成一受訪者直指郵政混帳多籮籮；二成六認為郵政改革只係做騷；三成四不滿浪費公帑。

正所謂，掃帚不到，灰塵照例不會自己跑掉。太一叮都係嗰句，香港郵政不務正業，添煩添亂，早就病入膏肓，一係落重藥徹底剷除病根，一係關門大吉永絕後患，為納稅人慳番筆都好吖，叮！