城中鏡：肥亨女婿為恩師獵頭
商務及經濟發展局前局長「肥亨」馬時亨女兒Christine馬露明創辦嘅品德教育中心尋日舉辦畢業禮暨慈善嘉年華，香港大學醫學院院長梁卓偉亦捧場，原來佢係Christine老公Kevin劉仲恒當年讀醫時嘅老師，Kevin知道梁卓偉搵人心切，笑言要幫手發掘有潛質讀醫嘅人才喎。Kevin話梁卓偉係一個好好嘅老師，所以要介紹多啲人畀佢做學生。品德教育中心目前同某知名中學合作推行品德教育，發現當中唔少學生都有興趣讀醫科。
劉仲恒（左）笑稱要幫梁卓偉（中）介紹讀醫科人才，右為馬露明。
講番畢業禮，Christine帶領小朋友合力度橋設計攤位、遊戲同義賣紀念品，為兔唇裂顎患者籌款做手術。佢話每年會幫唔同機構籌款，往年幫過盲人同弱能人士，今年受益對象係兔唇患者，因為咁樣小朋友會易啲理解。
