城中鏡：舞出潛能
百仁基金尋日舉辦一場分享會，請到三位成功人士與學生分享奮鬥故事。有「頭箍小姐」之稱嘅前高官區璟智以協青社主席身份重出江湖，仲帶咗兩隊街舞高手去表演助興，其中三位好跳得嘅女仔曾經係夜晚流連街頭嘅青年。區璟智話依家見佢哋跳舞頭頭是道，仲可以上台表演，覺得年輕人有好多潛能可以發掘，最緊要唔好放棄。
李文俊亦落場跳埋一份。
張國威（左起）、郭正光同蔡俊輝分享行行出狀元經驗。
區璟智話好開心有舞台可以畀年輕人小試牛刀，希望街舞表演可以發展成另類社企，以便幫補年輕人嘅生活。除咗街舞，遲啲仲要搞專業滑板、舞台設計同泰拳課程，發掘年輕人唔同潛能，等佢哋有一技傍身，唔會誤入歧途咁話。
李文俊因湯水浪子回頭
為咗畀大家睇吓街舞嘅難度同價值，區璟智、中央政策組顧問高靜芝、百仁基金主席李文俊同副主席羅詠詩等人仲落場學舞，見佢哋跳到雞手鴨腳，下下都慢半拍，好搞笑。
講番分享會，現身講述奮鬥故事嘅包括科技公司創辦人郭正光、國際牛仔褲品牌創辦人張國威同酒店主廚蔡俊輝，三人都係讀書唔成，但搵到興趣一樣都有唔錯嘅發展。李文俊就自爆大學畢業後試過離家出走，笑言後來因為冇湯水飲，所以迷途知返。其後佢創立造紙公司，都遭遇好多挫折，但為啖氣冇放棄。有人話「成功靠父幹」，佢唔否認起步點好過人哋，但覺得成功最大要素係堅持唔放棄。佢話百仁未來一年會搞多二十場分享會，為年輕人灌輸正能量。
