建制派WhatsApp群組訊息洩密事件，令政界風聲鶴唳，好多政界人士都怕手機秘密資料外洩，或喺立法會玩手機時被影到。教育局局長「吳得掂」吳克儉就成日畀人影到喺立法會會議期間分心，有次仲被揭發睇緊股票，唔知佢有乜嘢心得避免再衰多次呢？

喺立法會玩手機時被影到

吳得掂聲稱平時喺議會內玩手機，都係睇實用性資訊居多，如果有娛樂資訊通常會返屋企至睇。經呢次WhatsApp洩密事件後，佢都話唔打算清除WhatsApp嘅內容資料，因平時都靠WhatsApp同其他同事溝通，至於機密資料就面對面同同事講，唔會用電話。

食物及衞生局局長高永文就話平時好少透過WhatsApp發出機密資料，所以唔太擔心對話資料外洩。不過佢會同政府嘅科技同事研究吓，到底使唔使定期清除機內嘅資料，免除後患喎。

第一手消息請下載on.cc東網iPhone/iPad/Android/Windows Phone Apps