話說美國最高法院上周歷史性通過全國同性婚姻合法化,好多支持平權嘅人都欣喜若狂。人稱「廢鑊」嘅平等機會委員會主席「周一鑊」周一嶽第一時間跳出嚟話,香港社會唔可以避免同性婚姻呢個問題,希望社會就呢個議題有更多討論。點知話音甫落即惹嚟內外夾擊,平機會前主席林煥光話同性婚姻呢個議題要時間慢慢醞釀,唔能夠勉強。平機會委員周浩鼎都插佢話,周一鑊咁高調發表言論,憂慮外界以為平機會支持同性婚姻合法化,咁就好大件事喇!無論外人同自己人都覺得周一鑊咁講係有問題,睇嚟佢今次真係要反省吓,作為平機會主席係咪行得太前。

設計圖片及對白

平機會委員批過早表態

周浩鼎明言多年嚟對同性戀有一定保留,特別反對同性婚姻合法化,佢好擔心同性婚姻一旦合法化,會嚴重破壞中國人嘅婚姻制度同家庭倫理核心價值,認為呢啲問題唔係靠兩個成年人領養兒童就解決到。佢話喺同性議題上,大家有唔同諗法其實好自然,而平機會內部都不時作出討論,但唔認為平機會應該咁快作出表態。

但周一鑊有理無理講咗先,話除咗美國外,新西蘭、法國、愛爾蘭等十幾個國家,都相繼通過同性戀婚姻合法化,希望社會各界可以就同性婚姻多啲討論,平機會亦會參與有關討論。就係呢幾句激起好多人不滿,唔止周浩鼎呢啲平機會中人有微言,連林煥光都暗寸周一鑊。

前主席:美國還美國

身兼行政會議召集人嘅林煥光話,對同性婚姻喺香港立法一事有保留,始終「美國還美國」,認為呢啲事要取得較大共識先有機會推行,唔可以急。睇嚟,周一鑊呢次又衰多一鑊。

其實周一鑊都唔係第一次咁快跳出嚟興風作浪,舊年同志團體搞遊行,佢就高調現身撐場,即惹來唔少保守派批評,覺得佢立場傾斜向同志團體,唔得中立。有人更加質疑話,如果反同性戀團體搞遊行,周一鑊係咪都應該撐場先?

第一手消息請下載on.cc東網iPhone/iPad/Android/Windows Phone Apps