相信打工仔每年收到張綠色嘅個人入息報稅單時都笑唔出，唔少人仲用「綠色炸彈」嚟形容。財經事務及庫務局局長陳家強尋日喺網誌上話，自己用咗十幾分鐘就搞掂張稅單，事關佢係用網上報稅。陳家強回憶當年喺美國教書時，每年收到厚疊疊嘅報稅表時，都不禁皺起眉頭，因為美國稅種繁多，除咗入息稅外，仲有利息稅、股息稅、資產增值稅等，而為咗申報免稅額，佢仲要儲低一年以嚟嘅各種單據，每次都要花最少兩日處理啲資料。

陳家強

點解佢突然講咁多稅務嘢？皆因歐洲委員會最近將香港列為全球三十個「不合作稅務管轄區」之一，其實係有人誤解香港簡單低稅制，錯將天堂（heaven）當成避稅港（haven）。佢直指名單製作過程粗疏，指控毫無根據，兼有違國際間就稅務透明評估制訂嘅程序，所以已向委員會表達不滿喎。

第一手消息請下載on.cc東網iPhone/iPad/Android/Windows Phone Apps