立法會傾啟德體育園區一波三折，試過喺立法會工務小組遇到拉布，又試過為咗令蓮塘／香園圍口岸工程可盡快喺財委會通過而被夾硬抽起咗。呢個項目每次傾都畀人鬧係「大白象」，但係民政事務局局長曾德成就懶懶閒，好少話幫吓口解釋。唔知係咪潛水潛得耐，臨到財委會審議前期工程撥款前，曾德成終於瞓醒，喺佢嗰個專門風花雪月嘅網誌上寫幾句咁多，為啟德體育園區消吓毒。

唔知曾德成仲有乜嘢招數去幫啟德體育園區搣甩「大白象」嘅「污名」？（資料圖片）

曾德成話大型場館係為咗舉行盛大活動而設，集合幾萬人嘅盛會係唔可能頻繁舉行嘅，但係如果冇適當規模嘅設施，就冇可能舉行呢類盛事。佢又話世界其他大型體育館，例如英國嘅溫布萊球場、威爾斯嘅千禧球場同法國法蘭西體育場，每年有二十到三十個大型活動日，其他日子通常閒置喺度，仲話呢啲係大場館運作嘅規律添。

第一手消息請下載on.cc東網iPhone/iPad/Android/Windows Phone Apps