政壇：KK揚言花生友笑唔耐
立法會早前表決政改方案，建制派三十三人突然離場冇就政改投票，加上近日洩露內部討論政改嘅WhatsApp訊息，互相批評之聲不絕。盛傳參與新界東補選嘅公文袋新東支部主席楊岳橋尋日出席電視台論壇時，就諷刺建制派洩露WhatsApp訊息唔係「技術性失誤」，中央唔會容忍蝦碌同失禮嘅事。工聯會立法會議員KK黃國健就話，離場冇投票只係鬧劇，一時技術性失誤，揚言「呢排啲人食飽花生之後，笑得幾耐？」佢又話諺語「笑到最後嗰個先係笑得最好」，邊個笑到最後到時先知喎。
設計圖片及對白
黃國健同田北辰尋日為政改甩轆事件向公眾鞠躬道歉。
KK承認佢哋喺關鍵時刻犯咗低級錯誤，但洩露WhatsApp訊息係個人道德行為，同建制派無關，冇證冇據就無謂點名。佢又話訊息內容冇政治機密，建制派都係人，有情緒就會宣洩，話到明楊岳橋喺中間挑撥係冇用。
田二少認責兄語氣太重
新民黨議員「田二少」田北辰同佢胞兄、富貴黨議員田北俊最近都就建制派蝦碌離場一事互數不是，有觀眾就話「本是同根生、相煎何太急」。田二少就話與其將感受積埋喺心裏面，倒不如講晒出嚟，相信之後會有利團結。田二少話近期都有同胞兄食飯飲酒，但就冇傾公事，承認自己語氣或者太重，算係經一事長一智。
田二少講講吓，就主動問邊個鏡頭對住佢，之後就對住鏡頭鞠躬道歉。台下嘅白鴿黨元朗區議員鄺俊宇之後向KK「挑機」，問佢會唔會學田二少鞠躬，KK即刻話問題「幼稚」，「鞠多個躬有乜問題」，跟住就鞠躬。
論壇中間亦有插曲，本來主題係講政改方案否決一事，點知講講吓講咗港區全國人大代表有冇反映港人意見。身為前人大嘅KK就質疑唔公平、冇預到講，之後佢同現屆人大嘅田二少都趁機講向中央反映咗乜嘢。
