失信於民呃津貼 香港郵政爛入心

本報早前踢爆香港郵政頻頻遺失郵件，甚至出現濫賠情況，引起一片嘩然。立法會尋日跟進事件，議員要求當局解釋，結果唔講猶自可，一講嚇一跳，一○年至去年，香港郵政遺失本地郵件一百六十六件，遺失寄往外地嘅郵件近六萬三千件，合共賠償金額超過一千八百萬元。淨係去年咋，遺失本地及海外郵件達七千三百多件，賠償金額接近二百一十萬元，問你服未。

即係咁，香港郵政話就話以營運基金形式運作，自負盈虧，但始終涉及公帑，淨係上個財政年度已經虧蝕逾億元，加上因為遺失郵件而賠償，真係多多公帑都唔夠浪費。雖然商務及經濟發展局聲稱，遺失外地郵件嘅賠償個案中，大部分都係由目的地郵政機關支付，香港郵政只需承擔小部分賠償金額，但小數怕長計，呢度蝕啲，嗰度賠啲，再咁落去，營運基金遲早乾塘，最後咪又係納稅人埋單。

最離譜係，香港郵政一方面每年濫發兩億元超時津貼，另一方面郵差集體蛇王騙取超時補水，直情好似無王管，當納稅人係提款機。醜聞經本報踢爆後，郵政員工群情洶湧，紛紛要求審計署「開快撈」介入調查。咁又係呀，部分蠱惑員工申領津貼花樣百出，藉口多多，誇大處理郵件數目有之，返工詐病收工突然「好番」開OT有之，日頭行行企企夜晚申報通宵津貼又有之。有人甚至可以申領高於上限嘅超時津貼，幾乎等於半份人工，而香港郵政居然有求必應，你話呢個係乜嘢世界吖？對守法員工公唔公平吖？

講真吖，香港郵政管理混亂，烏龍百出，早就唔係新聞嘞，審計署幾年前已經開火炮轟，要求改善經營，點知香港郵政一直當耳邊風，情況冇改善不特止，反而更加惡化添。正常嚟講，生意唔好，工作量減少，人手應該下調至係，但香港郵政員工總數一直維持七千人，養埋咁多冗員，唔怪得醜聞多多喇。

廟小妖風大，池淺王八多。香港郵政管理混亂，爛到入心，已經無藥可救。審計署固然應該介入調查，港府更應該出手清理門戶，唔好任由郵政官僚佗衰家吖，叮！