平日講嘢一向大大聲嘅立法會議員劉慧卿，尋日突然冇晒氣，原來係因為病到失聲，就連路過嘅食物及衞生局局長高永文聽到佢講嘢講得咁辛苦，都忍唔住問候佢兩句，叫佢記得要休息多啲。

卿姐話早兩日出席一個電視台節目，當日只係着咗件短袖衫，通常錄影廠冷氣比較大，結果一唔小心咪感親病咗囉！佢仲大呻因為喉嚨痛，搞到冇覺好瞓，雖然已經睇咗醫生，又聽中醫講食咗啲鹹竹蜂，但仍未見效喎。

見佢尋日講嘢都要捏住喉嚨嚟講狀甚痛苦，講到走晒音，睇得出佢真係幾痛。但在場議員聽到佢把聲，就忍唔住笑到碌地，結果卿姐足足用呢把聲發言約十二分鐘。

第一手消息請下載on.cc東網iPhone/iPad/Android/Windows Phone Apps