政改爭議終於落幕，雖然衍生唔少政治餘波，但商界普遍認為香港營商氣氛最差嘅時機已經過去。由香港鐘表業總會（總會）前主席「華哥」梁青華投資嘅天寶鐘表，早前喺尖沙咀彌敦道開設全港首間零售店，開幕時到賀嘅業界翹楚同城中名流好多，華哥話睇好香港鐘錶業前景，希望社會放低無謂爭拗，全力拚經濟，佢同時睇好澳門市場，九月初將赴澳開設首間名錶專門店。

梁青華夫婦一早到場迎賓，華哥希望社會放低無謂爭拗。

Markus（左）同品牌負責人Susanne來港見證開幕禮。

孫秉樞籲業界穩紮穩打，處變不驚。

劉楚照（左）同兒子劉子聰聯袂現身。

同場嘅總會永遠名譽會長孫秉樞亦話，希望立法會嚟緊審議嘅民生議題可以通過晒，咁就皆大歡喜喇！佢自言入行六十年見慣晒風浪未驚過，事關香港本身係福地，只要大家穩紮穩打，處變不驚就得。

劉楚照望舖租下調

咁啱最近有上市鐘錶公司公布業績，盈利大跌近八成，唔通情況仲好差？代理瑞士名錶嘅德譽（控股）董事總經理劉楚照好有感觸咁話，其實好多業界原本盈利唔差，但係一大截利潤都被租金食晒，如果租金可以跌一半就好。

當日嘉賓眾多，專程由德國來港嘅名錶品牌老闆Markus Lehmann都話對墟冚場面大開眼界。專為低收入家庭嘅言語障礙病童提供支援嘅庭恩兒童中心創辦人黃家寧都喺度，事關華哥趁新店開張，呼籲各界好友將花籃代金捐畀庭恩兒童中心，難怪黃家寧要親自接收喇！

第一手消息請下載on.cc東網iPhone/iPad/Android/Windows Phone Apps