SUN揭秘：劣食魚蛋燒賣飯 小店大創意

葵涌廣場每走五步，就有魚蛋「可篤」，有辣有唔辣，任君選擇。二樓轉角的這間小食店，在每日午飯和放學時段，光顧者絡繹不絕。四十二歲的陳老闆陳志榮有甚麼秘技呢？其實是一個「平」字。

咖喱魚蛋、燒賣這類小食，以營養價值來說，只屬劣食級，變成平價飯，亦只可形容為「騎呢」。惟這個魚蛋飯、燒賣飯，卻在網上熱爆，亦被網友形容為劣食界中代表作。事實上光顧者由OL上班族、師奶大叔，以至學生哥，人人皆好此飯。

「初頭賣埋飯盒嘅時候，六蚊一碗白飯。啲學生哥冇乜錢，又要平又要飽。於是佢地就淨係要一碗白飯，加多六蚊一串魚蛋，夾埋都係十二蚊。」陳老闆初期只將魚蛋、燒賣「撈埋一盒」賣給學生，豈料其他客人見狀，質問他「點解唔賣畀我」，於是索性推出平價飯，即使近年物價飛升，飯盒也只在今年加價一元，十三元就有交易。

貴租難捱 為客頂硬上　

「每個飯長期都係keep住賺一蚊咋！來貨價加咗，我哋先加，成間舖頭嘅毛利都畀個飯拉低晒，只係靠啲小食同糕點補番數。」即使創意爆燈，平絕街頭巷尾，仍不敵大市。「呢幾年生意差咗好多，可能個個供樓，負擔重咗，小食都食少咗。」陳老闆說來不無唏噓。即使自稱「上了岸」，仍不敵貴租。

「以前每次加租都係幾千蚊，對上一次加咗兩萬，依家七萬一個月，嚟緊九月續約，再加就唔做喇！不過次次話唔做，都畀人鬧番轉頭。」陳老闆在此開業十年，結識不少惡形惡相的熟客仔，「之前試過停賣平價飯，日日煮汁好辛苦嘛！啲客鬧我，『你唔賣我食咩？』惟有繼續整啦。哈哈！」說罷，一對腰果眼和小酒窩又偷偷跑出來。

夫妻同心一腳踢

每個成功男人背後，都有個女人默默支持。老闆娘風華正茂之時，結識了眼前這個「肥仔」，陪伴他走過大笪地，經歷○三年沙士，一起篤魚蛋過了半生。「後生嗰陣，大家喺百貨公司做同事識嘅，之後一齊去上環大笪地賣魚蛋同糕點，後尾搬去瀝源邨，都係我哋兩個一腳踢。」

○二年大笪地重開，本來做傢俬推廣員的他們決定闖一闖，「嗰時真係白手興家，沙士之後搬去瀝源邨，做咗幾年，儲咗啲熟客，商場就話要我哋搬入死角位，我哋唔肯。之後佢話畀番個靚位我哋，我哋都話唔做！」陳老闆有骨氣之餘，還有大無畏的實驗精神。

「佢個人好鍾意試新嘢，成日拎啲食物做實驗。」陳太說「肥仔」造糕點時，遇上不發酵的情況，就會跟酵母聊天，「佢都傻傻哋！」陳老闆卻辯解：「要用心機先整到好嘢食o架嘛！淨係掛住賺到盡咩！」究竟要有多少的愛，才可以容納這個男人古靈精怪的遠大理想？