仲記得泛民主派舊年單方面破壞協調協議，以「冧友」方式奪去工務小組同人事編制小組委員會嘅控制權，一批建制派議員其後「補鑊」逾期加入，但就遇上泛民諸多阻撓。被轟背信棄義嘅泛民毫無悔意，好似工務小組委員會主席「袋巾傑」梁家傑，尋日匯報過去一年嘅工作就話一四至一五年度共批出四十七項工程，涉及款項亦達到四百七十七億元，反觀去年由建制把持嘅工務小組，只係批出二十一項工程。

（設計圖片及對白）

佢又話工務小組喺泛民控制下，可以有效監察行政機關，有策略咁運用議事規則迫使政府處理民生項目先，反映特首「輕民生、重鬥爭」，仲話建制派可以向佢哋借鏡喎。

聽佢喺度自吹自擂，但被反問泛民拉布阻礙民生，算唔算喺議會內搞鬥爭？袋巾傑就辯駁話，阻礙不義嘅政府編排項目次序係議員應有之義。人事編制小組委員會主席梁繼昌就話，所謂不合作運動只係得個名，畀時間議員發問並唔係拉布，佢哋只係盡責任監察政府喎。當日泛民信誓旦旦話要喺議會內搞不合作運動，今日就將拉布忘記得一乾二淨，唔通係丁蟹上身？

咁泛民會唔會計劃喺下年度再次突襲兩個小組委員會，袋巾傑話相信建制派會力保兩個主席位。查實建制派上次痛失兩個小組委員會控制權，再加上近期政改投票上演世紀「甩轆」笑話，嚟緊實會傾盡全力、不容有失，相信泛民想爭都冇咁易喇！

第一手消息請下載on.cc東網iPhone/iPad/Android/Windows Phone Apps