政壇：范國威搞本土「港人港雞」
政府舊年底喺內地進口活雞樣本中發現H7禽流感病毒之後，一度暫停內地活雞供港。立法會批發及零售界議員方剛尋日就活雞供港事宜喺立法會向食物及衞生局局長高永文提出質詢。同「阿毛」毛孟靜組成「香港本土」嘅范國威唔知係咪搞本土搞到上晒腦，質問高永文可唔可以考慮搞「港人港雞」咁話。
范國威（後）忽發奇想，叫政府考慮搞「港人港雞」。
議員鬧爆周一嶽
范國威尋日喺立法會就話，既然內地雞嘅飼養環境有欠保障，問當局可唔可以考慮搞「港人港雞」，實行香港雞香港養，又質疑當局係咪要扼殺本地雞農嘅機會。而飲食界議員張宇人亦都加把口怒插高永文黑箱作業︰「你決定有雞嚟就有雞嚟，冇雞嚟就冇雞嚟……香港人食貴雞，周一嶽（食衞局前局長）係始作俑者，你就係變本加厲！」
但高永文回應話政府並唔係想扼殺本地雞農嘅機會，只係只要養家禽，就會有風險。
高永文又澄清並唔係佢話有活雞供應就會有活雞供應，都要視乎內地雞場係咪有申請將活雞供應番畀香港咁話喎。
