政壇：油尖旺區會遲來撐政改
立法會上周四表決政改方案時，三十三名建制派議員因為要「等埋發叔」，喺投票一刻突然拉隊離場，搞到政改方案只得八票支持「甩轆」收場。油尖旺區議會今日召開會議，根據區議會網頁顯示，其中一項議程竟然係「支持通過政改方案」。莫非該區區議會主席鍾港武諗住總動員，就算政改無法喺立法會通過，都要喺區議會上高票通過，用遲來嘅撐政改幫建制派挽回劣勢？
（設計圖片及對白）
油尖旺區議會網頁顯示，今日下午將會召開今年第三次區議會會議，睇番議程，唔少都係區內事，例如油尖旺文化藝術活動、道路安全運動、公民教育活動、廣華醫院重建等。但睇到第二十二項議程，就赫然見到「支持通過政改方案」，提呈人分別係油尖旺區議員莊永燦同建仔嘅楊子熙，二人同屬建制派議員。
技術問題難撤回
相信唔少人見到呢個議程都好愕然，點解已被否決嘅政改方案，依然有區議員提呈支持通過？我哋問過莊永燦，佢話上述議案早喺六月十日已經提出，當時立法會仍未就政改方案表決，佢哋覺得有可能延遲表決或未有結論，所以希望喺區議會會議中拎出嚟討論，睇吓可唔可以爭取更多支持。惟事隔一周，政改方案已成明日黃花。
咁點解呢項議程仍出現喺議程上呢？莊永燦解釋，根據議事規則，議員唔可以喺會議前撤回議案，要等到討論有關議案、即係大約今日下午六時許，先可以提出動議撤回議案，呢個係技術性問題喎！
雖然區議會投票應該唔使等埋發叔，照計唔會出現「甩轆」事件，但今次區議會議程似乎係純粹「蝦碌」，而唔係建制派打算贖罪嘅計策。其實，驟眼睇真係以為政改方案有轉機，可以喺區議會由頭嚟過添！
