美容規管歎慢板 放任自流埋禍根

唔係講笑，三年前嘅美容毒血針事件引致一死三傷，揭露醫學美容無王管嘅亂象，當時港府信誓旦旦要立法規管，點知話口未完，又先後發生兩宗抽脂傷亡事故。其中一位抽脂死亡個案嘅家屬尋日出來伸冤，指事發至今已經一年，當局依然未能查明真相，未有人需要負責，親人死得不明不白，質問港府係咪想悲劇不斷重演。協助家屬嘅立法會議員亦批評當局由檢控到規管都係採取拖字訣，完全不負責任。

咁又係吖，當局不負責任，簡直係靠害。呢，日前又發生一宗好媽媽電療猝死嘅不幸事件，今次雖然唔係醫學美容，但性質大同小異，都係掛羊頭賣狗肉，以保健理療為名，行醫學療程之實。當局冇監冇管，令呢類涉及高風險醫療程序嘅美容場所遍地開花，消費者根本無所適從，只能望天打卦嘅咋。

最離譜嘅係，港產官僚踢一踢先識郁一郁，每次出事都話非常關注，風頭過後就冇咗件事。淨係規管醫學美容咋，因為美容業界有阻力，一直得個講字，直到去年先至發出一份冇法律約束力嘅指引區分醫療與美容行為，要求業界自律喎，咁同無牙老虎有乜分別吖？至於醫療儀器註冊管制措施，更因為難以喺法律上界定何謂「醫療程序」而遲遲未有下文，家陣連相關研究報告都未展開，遑論諮詢同立法。

可能畀人鬧得多，當局終於知衰啩，食衞局局長高永文話喎，絕對唔會不了了之，正朝着發牌規管方向做立法研究，日後凡涉及高風險醫療程序嘅處所都必須領牌。問題係，當局做嘢拖拖拉拉，發牌規管都唔知仲要等到何年何月。再講吖，家陣呢段規管「空窗期」事故不絕如縷，當局連根據邊條條例起訴涉事人都唔清唔楚，你話受害人係咪死得冤枉吖？

官不殺伯仁，伯仁因官而死。正因為港產官僚無能失職，長期放任自流，至搞到亂象叢生，唔止美容醫療不分，保健醫療同樣界線模糊。愛美係人嘅天性，美容並無對錯之分，消費者最緊要小心選擇，千祈唔好要靚唔要命吖，叮！