城中鏡：中總115周年 1蚊促銷行樂
篤信佛理嘅香港中華總商會（中總）會長楊釗，向來鍾意行善。日前趁中總成立一百一十五周年，佢就同一千五百家商戶合作推出多個「一蚊」促銷。楊釗話，要開心最緊要係懂得「三樂」，就係「知足常樂」、「助人為樂」、「自得其樂」，以優惠價買到心頭好，就係自得其樂嘅好方法喎。
楊釗（前排中）宣布聯同多個商戶推出「一蚊消費」，與民同樂。（互聯網圖片）
一連九日嘅全城消費活動，由本月二十五日起開始，逾千間商舖參與，包括各大連鎖飲食及零售商。唔少筍貨以一蚊低價出售，好似「一蚊一個羅漢果」、「一蚊一両花旗參」等，部分優惠更低至三折。通街有平貨執，莫非要為否決政改方案沖喜吓？楊釗就話，同各大商戶聯手推優惠，旨在令社會增加多啲正能量。睇見人人享受到購物樂趣，佢都開心埋一份。
