城中鏡：工業轉型增值
近年好多唔同類型嘅工業都相繼升級轉型，咁啱香港青年工業家協會尋日舉行「飛越港蘇體驗計劃」啟動禮，做印刷出身嘅協會秘書長謝葆德（Peter）、從事珠寶業嘅副會長冼雅恩、塑膠業嘅廖錦興（Bobby）、經營衣架生意嘅義務司庫戴麟（Paul）及鐘錶業高層、執行委員高鼎國都有出席交流，Peter同Paul仲分享所屬行業嘅新趨勢。
嚴志明（左）與謝葆德（右）將於七月帶領一班學生到內地實習。
戴麟（左）及廖錦興均指要讓員工作不同決定，公司才能有更大發展。
冼雅恩（右）及高鼎國（左）近年積極培育業界新一代。
Peter話，過往學生於暑假買教科書總係唔可以一次過買齊，皆因書商不時改版更新，重新印刷一般要花三、四個星期先完成，等到開學都未搞掂，但佢哋嘅東莞印刷廠已經引入咗一部超大型電子印刷儀器，只需三個員工操作，計埋釘裝，兩、三日左右就搞掂，以後學生就唔使再等咁耐喇，科技為一眾學子帶來便利。
帶學生往內地實習
專門生產衣架嘅Paul話，做工業要多留意及物色新市場及為產品增值，例如有次佢收到有個中東客人，落張訂單生產幾十個鑲鑽石嘅衣架，又有著名高級時裝搵佢哋訂製專屬該品牌嘅全木衣架，令產品唔再係普通日用品，而係可以度身訂造、反映個人風格嘅精品，走上高增值路線。
從事家具生意嘅協會會長嚴志明就話，協會將於七月底帶領三十多位學生出發到寧波、蘇州、南京及上海四地進行五星期工作實習，等佢哋了解現時工業界工作環境，並吸納年輕一代入行。
