政府調整立法會財務委員會嘅撥款議程後，財會有望休會前一筆清晒紓困措施嘅撥款。財委會主席張宇人（Tommy）見唔使「拉布」，都配合安排暑假前最後三次財會都加開一節，至每次會議開足六小時。不過，佢講到明無意連任下個立法年度嘅財委會主席。但我哋又聽聞另一版本，原來係建制派寧願將個波交畀財委會副主席陳健波接手，都要踢走Tommy喎。

Tommy話，「更表」協調咗佢同吳亮星（星爺）梅花間竹咁做兩年，佢應承主持第一、三嘅立法年度財委會。自言年紀大、每個星期困坐立法會咁耐，文件又咁厚，單係過去一個年度嘅財委會會議已經係歷年最多。為咗做好主席呢個位，已經丟低咗生意冇理，所以決定準時退位交棒。

陳健波唔爭做

雖然呢個係燙手山芋，但據知建制派早已屬意陳健波接棒。我哋問過陳健波，佢先猛呻財委會主席係辛苦工，一定唔會主動爭取去做，但如建制派提名佢，亦會義不容辭。有政界人士耳語話，其實Tommy想下個立法年度「多坐一會」，豈料消息見報後，有建制派中人暗寸話，建制派大把人可以接手，擺明唔想益Tommy。不過，上周建制派在政改表決甩轆後，葉國謙、林健鋒等人需要被「祭旗」問責，好似一直被視為建制派陣營「班長」嘅阿謙，即將面臨行政會議議席、立法會「班長」及議席、區議會議席嘅四失，建制派有咁多個重要位置要填窿，搵人都係一大難題。

第一手消息請下載on.cc東網iPhone/iPad/Android/Windows Phone Apps