政壇：區議員夠騎呢驚樹葉傷人

幾個月之後就會有一場區議會選舉，街上嘅宣傳橫額漸多。有市民發現，區議員嘅橫額內容好多花款。最近，西貢區議員區能發更掛咗幅關注樹皮、枯葉跌落地嘅橫額。

區能發同黨友關注枯葉及樹皮問題嘅橫額引發議論。（網民提供）

佢嘅橫額內容係關注大片枯葉、樹皮跌下危及途人，要求當局加強巡視。不過，網民對於呢幅橫額就好質疑，更恥笑或者唔止係樹皮、枯葉嘅問題，而係樹根都有。區能發解釋，區內種咗唔少棕櫚樹、假檳榔，一塊樹葉砸落嚟閒閒地都八磅、十磅，真係會對居民構成危險，所以佢向當局反映呢個問題。

康文署事後都有採取行動，搵人修剪樹葉，咁樣算唔算名副其實嘅成功爭取呢？點都好，樹葉都要管，難免畀人小題大做嘅感覺喎，區能發笑言，區議員就係做呢啲，唔通日日講政制咩。