政壇：小米上半年自信做一哥

競爭令人進步，但亦令人難受。好似內地智能手機市場咁，各大品牌鬥得難分難解，依家，好快就到半年結嘅時間，邊個係一哥再成業界關注嘅焦點。小米總裁林斌就話好快就會揭曉，並且話到明小米嘅銷售成績將落晒其他國產手機廠商嘅面咁話。

點解林斌咁自信？根據手機中國聯盟由供應鏈獲得嘅數據顯示，小米今年上半年出貨將超過3,500萬部，相比去年同期的2,600萬部，同比增長超過30%，而今年Q2，小米銷量將超過2,000萬部。而上半年計，小米手機營收為400億元（人民幣．下同）。

之不過，作為小米頭號勁敵嘅華為，其第二季同今年上半年嘅手機銷售成績尋日同時曝光，話說華為上半年共賣出3,100萬部手機，手機營收超過430億元，在銷量上無疑仍輸畀小米，但營收就多小米30億元。

分析指皆因華為嘅手機平均售價較小米高，因此營收就已經超過小米。睇嚟下半年佢哋將會鬥得仲勁。