政壇：伯南克不滿換十元美鈔頭

自聯儲局任上退下後，伯南克今次出招引來唔少關注。佢喺自己網誌撰文，認為讓女性抬頭固然係好建議，但係就唔應該攞依家十元美鈔上嘅美國首位財長漢密爾頓嚟「開刀」。因為，漢密爾頓喺一七九一年有關成立美國鑄幣局嘅議案，為日後美國貨幣安排定立基礎，如果將佢從美鈔上「剝離」，實在諷刺。

咁換得邊張鈔票呀？伯南克提議財政部可以為二十元美鈔「換頭像」，皆因二十元美鈔上嘅前美國總統杰克遜曾反對成立中央銀行，相信佢對於自己嘅肖像唔使再印喺聯儲局發行嘅鈔票上都會感到開心。佢又勁踩杰克遜缺點多多，係個差勁嘅總統。不過，伯南克都承認，好難令當局改變主意，只能呼籲財政部盡力保住佢哋首個當家。