政壇：政圈瘋傳年老發叔病重
政改方案表決爆出建制大甩轆，除咗凸顯建制派缺乏溝通及獨立思考能力外，齊齊卸責話要「等埋發叔」先投票，亦反映大部分建制派A字膊。被擺上枱的新界鄉議局前主席劉皇發（發叔）只能夠解釋自己身體差，以及當日塞車而遲到。不過，據立法會耳語透露，近日有建制派議員不甘受壓，周圍瘋傳發叔中風、患癌，甚至「就快唔得」，所以點都要等埋發叔投下神聖票，聲言圓佢心願喎。
據知年屆七十九歲嘅發叔精神狀態對比上月預告交棒畀「發仔」劉業強之前，的確係差咗少少，發叔上月因此一度進出九龍塘大宅附近嘅浸會醫院身體檢查。亦有消息話發叔年紀已經有番咁上下，對腳最近唔聽話「冇力」，成日撐住拐杖出席公開場合唔好睇喎。我哋成功聯絡到發叔，佢聽到有關傳聞就笑笑口話：「冇，我聽日仲去立法會投票！」
事實上，發叔卸任鄉議局主席前後多次甩底公開活動，引起謠言都唔出奇，但若建制派議員為離場無就政改方案投票一事借發叔病重「過橋」，刻意誤傳老人家病重等於惡毒詛咒，實在無口德。
