公民黨爆出創黨成員退黨及辭議席事件後，新界東議席補選就成為政圈焦點。最快約於年底至明年初進行的補選有唔少人虎視眈眈，其中一個係因為力撐政改「袋住先」而面臨被逐出民主黨（白鴿黨）嘅黃成智。不過，成智先話有意參與新界東補選，白鴿黨嘅單仲偕就話，該黨唔會派人參選，仲話會勸退成智喎！成智都就嚟被逐出黨，單仲偕仲好意思叫人唔好選，佢哋有冇諗過用乜嘢身份去勸呢？你估白鴿黨玩晒咩！

月底前處理逐黨決定

單仲偕話，覺得由公民黨參與補選比較適合，因此白鴿黨不會派人參選。佢又解釋，因為泛民主派於直選嘅否決權可謂岌岌可危，由於現時泛民對建制在分組點票直選議席是十八對十七，泛民在修改議事規則上暫時仍有否決權，而白鴿黨認為由公民黨參與補選嘅勝算最大，因此為保住泛民嘅否決權，該黨不會參與補選，並會應公民黨要求給予協助。

對於成智表示有意參加補選，有白鴿黨內消息就指黨將不會對成智提供任何協助，而今次成智嘅做法與民主黨立場亦有不同。單仲偕就話，佢可以做一啲勸誡，但當成智被逐出黨之後，佢哋就好難對佢施加限制，事關到時成智做嘅事與黨已經冇任何關係，佢哋都冇咩可以做到喎！

至於有關成智早前被要求退黨一事，單仲偕就話會於下個月前處理，而黨紀律委員會將於本月底前向中委會就有關事項提交報告，決定係咪將成智逐出黨。

此外，正義聯盟召集人李偲嫣積極考慮出戰新界東補選，更對派人出戰年底區議會選舉不置可否。李偲嫣承認，獲大批支持者呼籲她參選，「過去二十四小時接電話接到癲咗」，加上對建制派上星期在政改方案表決時搞出「大頭佛」感到失望，認為「（議席）唔係建制食晒o架嘛」？

第一手消息請下載on.cc東網iPhone/iPad/Android/Windows Phone Apps