集體蛇王呃補水 香港郵政醜上醜
開講有話，出咗半斤力，想話攞番足八両。機電工程署一批員工尋日開記招，批評署方下個月起將超時補水改為補假，擔心喺人手短缺之下，導致超時恒常化咁話，咁講唔係冇道理o架。不過話又講番轉頭，如果有人開工當放假，公然蛇王不特止，仲呃埋超時補水，咁就罪大惡極嘞。
唔好誤會，太一叮講緊嘅唔係機電署，而係烏煙瘴氣、醜聞多多嘅香港郵政。本報記者連續三日喺荔枝角工業區，直擊五支特快專遞收派小隊廿二名郵差涉嫌集體蛇王。六部郵車約埋都冇咁齊，每日下午三點停泊喺偏僻街道，有人喺車內歎冷氣，有人玩手機，有人瞌眼瞓，有人索性去附近工廈歎茶煲煙，各適其適，不知幾梳乎。磨洋工都算嘞，有人居然攞着數攞到盡，每日支支坐坐搞到八點至「收工」，跟手呈報八十幾個鐘頭超時工作，知唔知「醜」字點寫o架？
姑且聽吓香港郵政點解畫。署方承認，涉事其中兩部郵車唔應該喺上址出現，承諾會徹查係咪有人呃補水喎。今次單嘢查成點仲要睇過至知，但香港郵政管理混亂，濫申超時津貼成災，就係鐵一般嘅事實。有人踢爆，員工申領津貼理由花樣多多，誇大處理郵件數目、返工詐病，收工突然「好番」開OT樣樣齊。由於署方好似黃大仙咁，有求必應，部分員工每月印印腳穩袋過萬元超時津貼，幾乎等於半份人工，仲有冇再狼啲吖。
一句講晒，臭罌出臭草，香港郵政管理亂龍，不務正業，乜嘢混帳事都可以發生，又點止濫發津貼咁簡單吖。淨係「失信於民」事件無日無之，已經有口皆悲，唔怪得香港郵政數簿年年見紅，上個財政年度更加虧蝕超過一億元，納稅人真係冤哉枉也。
嗱，一間公司經營不善，照計應該改善服務留客，偏偏香港郵政反其道而行，一味cut人cut服務，結果衰多幾錢重。最好笑嘅係，署方之前煞有介事聘請外國顧問研究點樣改革，點知結論唔啱聽，一句「意見唔達標」就想打發人走，連幾百萬元顧問費都想慳番，被洋顧問狠批「無法無天」，淪為國際笑話，簡直吹脹！
呢個世界好公平嘅，打工仔要求「半斤八両」，老闆何嘗唔係要求伙記交足貨吖。香港郵政出力就冇嘞，添煩添亂就有份，作為老闆嘅納稅人係咪仲有必要繼續供養呢個廢衙門呢，叮！
