城中鏡：葉振南歎監倉飯讚唔錯
汕頭商會會長葉振南日前帶隊參觀葵涌勵敬懲教所，同一眾副會長、常董初嘗「監倉飯」滋味。監倉飯餸菜有薯仔、南瓜、魚柳、眉豆粥等，清淡不難吃，佢試食後話味道唔錯添！不過，反而更生人士出獄後要覓得「一口飯」就唔係咁容易。
葉振南（左）初訪勵敬懲教所，助理署長（更生事務）鄧秉明親自講解。（受訪者提供圖片）
勵敬懲教所主要係囚禁犯輕微罪行嘅年輕女囚犯，為協助刑釋人士出獄後盡快重投社會，署方安排唔少技能培訓。葉振南到訪當日，刑釋人士主動用普通話介紹美容課程，又變身侍應，用英文示範喺餐廳接待客人。佢話部分釋犯入獄前學歷唔高，入獄後努力學習一技傍身，所以佢呼籲商界人士伸出援手，畀機會更生人士。副會長吳漢忠聽見即時響應，佢旗下兩間餐廳嚟緊會考慮聘用更生人士。
