曾俊華喺網誌上借NBA球隊，暗寸建制派無隊形。（資料圖片）
喺政改表決當日，建制派議員發動拉隊離場嘅「甩轆」事件，令政改方案僅獲八票贊成而大比數被否決，淪為國際笑話。財爺「鬍鬚曾」曾俊華同立法會主席曾鈺成尋日先後抒發感受，鬍鬚曾先喺網誌話對政改被否決感到十分可惜，又借NBA球隊金州勇士暗寸建制派唔團結兼無隊形。其後曾鈺成出席一項活動時談到當領袖嘅條件時，亦暗批建制派無團隊溝通、無默契，出事時又未能保持清醒頭腦及鎮定心態應對。
鬍鬚曾話今年支持嘅金州勇士隊得到四十年來首個NBA總冠軍，而該球隊非常重視整體性，後備兵源充足，相反騎士隊縱有「大帝」勒邦占士「單天保至尊」，但雙拳難敵四手，令佢體會千古不易的道理。佢又話七十年代末、八十年代初的NBA球隊很着重走位同整體合作，球迷愛分析教練使用的戰術，認為此是體力與智力結合嘅運動。咁講法，擺明就係暗寸建制派無隊形。
至於曾鈺成就話一個出色領袖應該具備嘅條件，其中好重要係溝通能力，要同團隊有效溝通，明顯寸爆建制派冇默契，令台下觀眾哄堂大笑，點知佢仲幽默反問：「乜我有講笑話咩？」佢之後仲直接舉例，話應變能力好重要，好似班議員計到發言時間幾準都好，表決時一樣會出事，所以一個好領袖要預計到，就算設計到最好嘅活動都會有出事嘅時候，要保持清醒頭腦同鎮定心態應對。佢話決斷能力亦好重要，出色領袖要當機立斷，喺適當時候要做最適當嘅決定，可以詢問他人意見，但唔可以將決定推畀其他人囉！
第一手消息請下載on.cc東網
