政壇：搞搞政：林健鋒商界議席危危乎
話說喺立法會差不多表決政改方案之際，建制派議員突然拉大隊離場，結果出現歷史性大「甩轆」。據悉其中一個關鍵人物、話「等埋發叔」嘅林健鋒，佢代表嘅香港總商會，內部都對佢好不滿，仲有聲音話下屆立會必須換人。
設計圖片及對白
有總商會中人話林健鋒已做咗三屆議員，加埋今次政改衰咗，係時候退位讓賢。據了解，林健鋒目前最少受兩面夾擊，首先係嚟自紅色勢力嘅衝擊。裕華國貨董事總經理余鵬春向來有志進軍立會，本來佢密謀藉富貴黨批發及零售界議員方剛明年退休，想搶佔該議席，但據悉當林成為政改甩轆關鍵人物後，唔少人都游說佢轉戰代表總商會嘅商界功能界別。
余鵬春現時係總商會理事，當年角逐商界選委亦高票當選。話雖如此，總商會向來有「西商會」別稱，會內充斥外資企業，好似現任主席彭耀佳，背後就係香港置地集團。余鵬春能否借林失勢而上位，還看明年總商會換屆選舉，如果能夠換上紅色色彩較濃嘅主席，相信余鵬春叫胡機會甚大。如果形勢係咁發展，到時總商會同中華總商會就冇乜分別。
至於第二個衝住林健鋒嘅力量就係富貴黨，眾所周知，該黨對總商會議席有情意結，尤其係「田少」田北俊、林健鋒二人不和後，該黨成日盤算點奪回議席。幾年前起田少已安排黨內第二梯隊陳浩濂入總商會，陳本身喺渣打銀行投資部任職高層，啱晒總商會口味。本來田少想陳浸淫多幾年先浮面，但依家林健鋒自毀長城，唔知道田少會否提早下令陳熱定身呢？
