政壇：王賢訊夫妻檔出兒童書
仁濟醫院副主席兼馬主Vincent王賢訊自小受父親王忠秣嘅薰陶，對賽馬萌生興趣，長大後成為馬場常客，仲視它為消閒同擴闊生活圈子的好地方，而佢嘅嗜好亦影響一對子女，三歲半嘅囡囡愛策騎，一歲嘅囝囝就鍾情馬匹公仔，一家三代都對「馬」情有獨鍾。另外佢亦同太太Vincci朱穎詩「夫妻檔」共同創作繪本小說，畀兒童輕鬆地學好語文。
朱穎詩每月都會去學校做分享會。
王賢訊夫妻檔合力創作繪本小說。
創作係王賢訊另一個人嗜好，喺兩年幾前開始同太太創作繪本小說《南山七小福》，佢負責故事創作，太太負責編輯。Vincent用中國神話故事同時事，例如日本福島大地震、釣魚島事件等當創作靈感。佢話：「我喺故事加入時事元素，唔係想表達乜嘢政治取向，而係等小朋友可以知道世界發生緊嘅事。同時我會加入笑位，好似周星馳嗰啲，等大家睇得開心！」
佢引用影帝劉青雲喺金像獎台上向太太郭藹明發表嘅「太空論」，嚟感激太太嘅支持。佢話：「我好多時有好多天馬行空嘅大膽諗法，全靠老婆將我嘅諗法實質化。」Vincci負責將Vincent創作嘅故事編寫成文，仲加入唔同嘅修辭手法同四字成語，讓兒童輕鬆地學習詞彙。Vincci滿足咁話：「我每個月都會去唔同學校做分享會，真係有小粉絲寫信畀我，好開心！」佢哋對《南》充滿信心，不但希望能打入中國市場，仲打算喺一八年推出卡通電影添。
