民政事務局局長曾德成見網誌多過見人，佢尋日又喺局長隨筆以題為「改旗易幟十八年」，講回歸講得相當興奮。德成局長仲話，截至去年底，香港有逾一百萬人係十八歲以下，佢哋喺五星紅旗同紫荊區旗下成長，從未經歷過「米字旗」同「龍獅旗」下嘅生活，冇可能親身經歷前後對比，但應該認識歷史。不過，面對去年佔領行動令社會撕裂，唔少青少年走上「勇武抗爭」嘅道路，唔知德成局長又知唔知發生緊乜事呢？

設計圖片及對白

民政局青年教育塞責

德成局長喺網誌提到香港仲有唔夠十日就回歸十八周年，又好雀躍講番九七年六月三十日下午及午夜，英國旗先後兩次徐徐降下，一雪半世紀恥辱。之後佢愈講愈興奮，講到十九世紀中國同列強簽訂嘅不平等條約，呢股愛國激情十足黃飛鴻上身，幾乎要唱番首《男兒當自強》。不過，舊年香港經歷過七十九日佔領行動，本土主義抬頭，仲有青少年走上「勇武抗爭」嘅道路。社會嚴重撕裂，但德成局長竟然依家話要呢班年輕人認識歷史，不禁要問佢上任以來，到底做過啲乜？須知，國民教育、身份認同等，都應該從小開始培養，除咗教育局責無旁貸，民政事務局亦須要為青年發展同公民教育負責。

德成局長成日叫年輕人熟讀歷史，但局方除咗搞下《基本法》活動，搞下制服團體之外，到底有冇花過心思作有說服力嘅宣傳，以至有系統嘅教育，令香港呢一百萬年輕人，了解到港英時期，作為中國人屈辱嘅生活，以至感受到回歸嘅好處呢？

第一手消息請下載on.cc東網iPhone/iPad/Android/Windows Phone Apps