龍舟鼓響,糉子飄香。今日係端午節,當年伍子胥被拋入錢塘江,屈原自投汨羅江,都係呢一個日子,所以根據民俗,五月初五宜祭祀,不宜慶祝,而食糉就係一種傳統習俗喇。不過咁,今時今日食品安全問題多多,食糉還食糉,最緊要小心選擇,否則,萬一買錯貨,隨時禍從口入。

話說食物安全中心早前抽取九十個糉子樣本,檢測染色料、金屬雜質及多種細菌含量,結果全部滿意喎。嗱,呢啲只係官方嘅講法,事實係咪咁,仲要睇過至知。正所謂,官僚靠得住,豬乸會上樹,食安中心檢測結果滿意,唔代表所有糉子都合格。

係人都知,家陣網絡銷售愈來愈普及,貨品應有盡有,連糉子都五花八門,只要輸入「端午節」、「糉」等關鍵字,網店任你瀏覽,從傳統鹹肉糉到貴價鮑魚糉瑤柱糉,任君選擇,豐儉由人。之不過咁,雖然網購糉子價錢比市面便宜,但衞生就毫無保障,呢類網店喺有牌食肆名單上完全搵唔到,生產者好可能係無牌經營,即係話呢啲糉完全冇經食安中心檢驗,究竟靠唔靠得住,冇人敢寫包單。

唔係亂噏o架,記者扮買家上網採購,結果發現糉子求其用膠袋裝住,既冇冰包亦冇保溫袋,表面已經開始「出水」,都唔知已經從雪櫃攞出來幾耐,萬一孳生細菌,後果可大可小o架。有立法會議員就講得啱嘞,食安中心冇抽查網店出售嘅糉子,好明顯係有缺漏,其實大部分網店都有聯絡電話同地址,食安中心唔肯跟進,根本就係失職。

當局又點回應呢?食環署話喎,上年度針對網上違例銷售作出十二宗檢控。唔係啩?家陣網購咁普遍,違例個案愈來愈多,一年只得十二宗檢控,擺明係敷衍塞責,咁仲唔係無牙老虎?

再講喇,食安中心一向後知後覺,渾渾噩噩,就算發現問題,最後可能都係不了了之嘅咋。好似早前發現懷疑打針嘅「嘔泡」西瓜咁,當局至今都冇清楚交代呢啲西瓜究竟有冇問題,你話市民又點可能對食品安全有信心吖。

講到底,求人不如求己,旨意當局把關,不如自求多福好過,尤其係黑心食品氾濫成災嘅今日,大陸係咁,台灣亦係咁,大家都係小心啲好。話唔可以亂講,嘢唔可以亂食,應節食品亦唔例外嘅咋,最緊要端午節安康,係咪!

第一手消息請下載on.cc東網iPhone/iPad/Android/Windows Phone Apps