城中鏡：關志康教路 咪郁啲寫App
依家人人一機在手，成日都聽到人哋批評現代人郁吓就做低頭族，難得尋日有人唱反調，佢就係百本護理主席關志康，佢話，創業之道千祈唔好人做你又做，仲話依家啲公司郁吓就話要寫一個APP（手機應用程式）為例，講明唔可以一本天書讀到老。
關志康指創業者應有獨立思維。（資料圖片）
關志康尋日出席一個企業創新嘅會議，但佢嘅話題就係鼓勵獨立思維，話有人建議佢公司搞個APP畀人上網搵看護，但佢不以為然，原因係：「如果佢（客人）要搵看護，佢想打電話嚟即刻有人聽，定係想Download你個APP，然後再喺上面『㩒』『㩒』『㩒』？佢鍾意邊一樣呢？」
唔好以為關志康拒絕科技，佢只係以自己公司嘅業務作分析，以佢哋經營嘅私家看護業務為例，唔少公公婆婆未必識得智能手機，故真人接聽、即時解決問題，真係仲直接喎。
