政壇：搞搞政：業界鬧爆 陳肇始急煞

擬「先訂立、後審議」捱轟

立法會衞生事務委員會曾於五月中開會討論過有關加強禁煙嘅建議，陳肇始就諗住用「先訂立、後審議」嘅方式處理，計劃開完會冇幾耐就實行，點知原來係無諮詢過業界嘅。煙草業界收到風後，搵咗代表業界嘅批發及零售界議員方剛出頭，喺會議上鬧爆當局，但政府竟然話已經諮詢咗區議會，認真騎呢。

方剛批評，擴大隧道出入口巴士轉乘站禁煙範圍梗係問區議會啦，但呢樣又唔係即刻實施，反而最影響業界嘅係更改煙包嘅健康忠告，點知當局就急住做。佢話，須知道改包裝印刷要喺外地做，唔係話做就做到，亦應該畀業界清咁啲舊貨先，煙草商都係合法商人吖，依家當食煙嘅人係犯法咁，加上無諮詢就想刊憲，簡直當立法會係橡皮圖章！有議員就話，食衞局官員已經表明，呢件事未正式刊憲嘅，七月六日或會召開公聽會，到時就睇官員點解畫嘞。