政壇：林健鋒做箭靶老竇呵番
政改方案表決時，三十多名建制派立法會議員因溝通失誤，集體離場，結果搞到政改方案僅獲八票贊成，呢宗「甩轆」事件嘅其中一個關鍵人物係身兼行政會議成員林健鋒（Jeffrey），事發之後，成為眾矢之的，尋日佢爸爸都忍唔住呵番阿仔，話好支持個仔，亦支持政改方案喎。
林亮冇為兒子解畫，但就好窩心咁話支持兒子從政。
好多人可能好奇，Jeffrey父親係邊位呢？咪就係「黃色膠鴨之父」、大半生從事塑膠製造嘅林亮囉，尋日林亮喺中午時分現身金鐘廊，被問及對事件有何看法，佢就話前日好早就休息，亦無睇新聞，所以尋日朝早先至知道事件，但佢拒絕評論呢件事。講到兒子從政，林亮就一百個支持，話佢本人對政治無乜興趣，但一直好支持Jeffrey從政，亦支持今次政府提出嘅政改方案喎。
