香港近年社會氣氛充滿戾氣,港交所前行政總裁周文耀尋日出席一個午餐會時,喺致辭中講起本港創新科技企業就慨嘆:「喺香港,做錯任何事,都係畀人批評,唔會話受到鼓勵。」佢覺得呢種文化要改一改,唔好覺得失敗係一件醜事咁話。

周文耀呼籲大家,唔好覺得失敗係一件醜事。

周文耀以自己去到美國科技堡壘硅谷觀察嘅經驗話,當地對待事物嘅文化好唔同,啲人反而鼓勵失敗,認為失敗十次,第十一次就會成功。佢因此勉勵與會者:「失敗並唔係永恒,最重要就係當中得到啟示,喺錯誤中學習,終於係會成功嘅。」

周文耀個演講的確非常勵志,但佢身為港交所前行政總裁,媒體亦好關心佢對市場動向嘅睇法。

當有人問佢點睇同股唔同權,佢又重申自己已經離開港交所崗位,唔會回應,叫記者「去問李小加」喎。

第一手消息請下載on.cc東網iPhone/iPad/Android/Windows Phone Apps