政改方案被否決，唔少市民都好失望，有團體仲即刻講到明出年嘅立法會選舉誓要票債票償。去年發動「佔領中環」嘅戴耀廷就話，呢一場立法會選舉將係重啟政改嘅關鍵，如果泛民主派喺立法會選舉可保住三分之一嘅議席，就可以反映市民支持泛民爭取普選嘅做法，咁就有機會令中央考慮「八三一」框架下嘅變化空間喎。

佢嘅大想頭係泛民保得三分之一嘅議席，但對於北京官員再三表明八三一框架唔係淨係適用於呢一次，佢就疑似選擇性失聰，仲扮大佬咁以為泛民會聽佢支笛。要知道，泛民正正就係因為政改方案建基於「八三一」決定之下，先堅決否決政改方案，但戴就話，呢屆政府重啟政改嘅機會唔大，但如果泛民主派喺立法會選舉可以保住三分之一嘅議席，咁就有機會令中央考慮「八三一」框架下嘅變化空間。點解佢會認為泛民明年會忽然打倒昨日嘅我，支持「八三一」決定之下嘅政改方案？即使係修訂嘅決定，泛民都必須跪低先有望向前行一步，或者戴耀廷知道今次拉倒普選罪大惡極，依家已經諗定轉身嘅方法。弊在特區政府同中央唔知幾時重啟政改囉？

第一手消息請下載on.cc東網iPhone/iPad/Android/Windows Phone Apps