政壇：辭職公投無下文 AV仁隨時走數
有「AV仁」之稱嘅民主黨（白鴿黨）立法會議員何俊仁，今年一月揚言要喺泛民主派喺立法會否決政改方案之後辭職發動變相公投，迫使政府重啟政改。AV仁一拋出建議就引起爭議，之後仲連較激進嘅學生組織「雙學」學民思潮同學聯都唔力撐，AV仁只好喺上月決定「暫緩公投」至否決方案後再決定。
設計圖片及對白
政改方案已被否決，據悉白鴿黨內部對公投嘅熱情已經淡化，亦冇人再提起搞公投一事，AV仁嗌辭職嘅風頭騷隨時走數都似。
單雞稱對決定「淡咗」
AV仁一月拋出要喺否決政改方案後辭職公投嘅建議後，唔少人都摸不着頭腦，白鴿黨內仲有溫和派明言反對。之後佢就計劃過改喺表決方案前辭職發動變相公投，不過「雙學」最後都因為組織內部分裂等問題對辭職公投反應冷淡，學民思潮仲明言要搞辭職公投嘅話，佢哋都會夾錢，但就唔會參與主要決策工作，AV仁先至決定「暫緩」計劃至否決方案後再作考慮。
早前泛民、「雙學」、佔中三子同多個民間團體就辭職公投成立嘅工作小組，就會喺下周四開會商討究竟仲會唔會搞辭職變相公投。不過，連AV仁黨友、立法會議員單仲偕都話，黨內對於辭職變相公投已經「淡咗」，所以都要開會傾吓，聽吓雙學、佔中三子等有咩睇法再決定。
另外，政改方案否決之後，泛民應該何去何從，大家都未有計劃，但嚟緊十一月就係區議會選舉，所以泛民都要好好部署再上路。泛民就計劃喺七月底搞個退修營，商討區議會同明年立法會選舉、選委會選舉同一七年特首選舉部署，以及點樣重啟政改。
