韓式美食店 潮服舖疫市難捱
新沙士在南韓肆虐，港府更對南韓發出紅色外遊警示，除了打擊當地旅遊業，亦影響本港韓店生意。本港不少南韓服裝店主常親身飛往首爾入貨，但眼見疫情愈趨嚴重，惟有取消入貨計劃，導致店舖出現「新貨荒」；部分舊款服飾亦因未能補貨，店主需退款給訂貨客人，生意下跌一至兩成。有店主擔心若九月疫情仍未緩和，無法親自揀選秋冬裝，便要透過當地買手入貨，令成本大增。韓食店生意亦受影響，港客大減一半，擔心貴租「捱唔住」。零售及飲食業界人士表示，疫情持續，令本已慘淡的生意雪上加霜。
Cindy取消了本月中及八月赴韓的機票，未能親自入貨。
林小姐指，不少客人對於沒有新款時裝感到失望。
Joey表示，未能親身往南韓入貨，「死貨量」有機會增加。
銅鑼灣其中一個商場人流稀少，場面冷清。
自南韓爆發疫情，金太的韓食店港人生意大減一半。
泡菜店負責人李太的生意亦受疫情影響。
款式少咗
劉先生（大學生）：新沙士對本港同南韓雙方經濟都應該有影響，維持愈耐相信會對本港韓貨店影響愈大。
鍾小姐（大專生）：好擔心新沙士會蔓延香港，行韓貨店都發覺款式少咗，轉行多咗連鎖店。
「本身月中同八月都訂咗機票去南韓拎貨，但見到疫情咁，都Cancel（取消）咗，唔飛住。」在銅鑼灣開設時裝店的Cindy，不時到南韓東大門入貨，計劃在六月中及八月赴南韓選購夏裝及秋冬裝，但港府發出紅色外遊警示後，惟有取消機票。她指，在當地聘請了一名買手，但買手亦因擔心感染新沙士而不敢經常外出，導致近日店內供應的新貨大減。
驚聞東大門有人中招
「買手話聽講東大門批發店有人中咗招，搞到佢都唔夠膽去嗰度入貨。」目前Cindy店內出售的韓貨多為早前購入的款式，她指，受疫情影響，補貨亦較以往慢，當地批發更因部分款式的訂單不足而拒絕接單，「以前補貨一般七日就運到，但依家可能要等一、兩個月。有啲批發商更加因為少咗人去嗰邊入貨，量唔夠所以唔接單，我哋惟有退錢畀訂咗嘅客。」
八月是時裝批發商推出秋冬款供訂購的時間，九月至十月當地會舉辦時裝周，搞手一般在七、八月向各地買手寄出邀請函，但Cindy至今仍未收到活動消息，擔心影響秋冬時裝的供應，「八月通常就要訂秋冬褸款，我到依家都未收到Fashion week（時裝周）嘅Invitation（邀請），唔知會唔會因為疫情要延遲。」她指如疫情持續，未來亦不會冒險赴韓，將轉到其他地方入貨，「親身去睇貨可以摸到衫嘅質料同試上身，但都冇辦法，可能要睇相訂貨，同埋都會轉去泰國同日本入貨。」
顧客憂衣飾帶菌唔買
在鰂魚涌經營南韓服裝店的林小姐，過往一個月赴韓一次購貨，現在已經暫停，「經Agent（買手）或香港批發，成本貴咗兩、三成，而且款都少咗好多，有好多客過到嚟都好失望，冇咩新款揀。」她指，七至八月是淡季，在「新貨荒」下更是雪上加霜，更聽聞鄰舖有客人擔心由南韓送港的衣飾帶菌，不敢購買。對於九月前能否赴韓，林則表示對疫情並不樂觀，惟有「畀貴啲」向本港批發商入貨。在同一商場出售南韓飾物的Joey則稱，未能親身入貨有機會增加「死貨量」。
至於在旺角賣南韓服飾的Kinki，由於未能親自赴韓，要透過買手採購，成本較以往高一至兩成，但由於當地買手入貨「唔係好啱香港人心水」，生意下跌一至兩成。而售賣南韓化妝品的Tracy亦指，部分港人「聞韓喪膽」，生意下跌一成。
至於尖沙咀的韓食店生意亦受影響，售賣南韓零食的金太指，自南韓爆發疫情後，港人對南韓食品「十分敏感」，港人生意大減一半，「租金好貴，希望快啲回復正常。」而泡菜店的李太亦說：「生意唔多唔少有影響，但泡菜本身殺菌，港人唔使太驚。」
香港百貨、商業僱員總會副理事長鄧祥勝擔心，本港韓貨店入貨成本大增，生意亦不如疫情爆發前，在商戶捱貴租下，會影響零售從業員生計。他擔心，疫情短期內仍沒有緩和迹象，對本港韓店會有負面影響，加上港幣持續高企，競爭力已較其他地區低，而旅客減少，零售市道更是雪上加霜，「因為唔係香港發生咗事，要業主減租未必有可能，如果真係好受影響嘅韓店，呢個時期可能要轉吓型，暫時唔好賣韓貨。」
香港餐飲聯業協會會長黃家和指，南韓一旦無法控制疫情，影響範圍更大，港人對南韓食品的信心會進一步下降。他指，如韓食店的生意持續受影響，將提供協助。
