政治紛擾無了期 香港怎會有運行
一如所料，政改一拍兩散，隨住立法會否決方案，持續近兩年嘅紛擾亦暫告一段落。之不過咁，政治爭拗已經成為無孔不入嘅風土病，政改落幕唔代表硝煙散去，香港想過番以前安定繁榮嘅寧靜日子，睇怕都好難咯。
講起真係令人唏噓。回歸前，香港雖然無民主，不過繁榮穩定，人人安居樂業，風調雨順；回歸後，香港多咗民主，可惜成日家嘈屋閉，內鬥內耗，都唔知為咗乜。最匪夷所思嘅係，激進抬頭催生港獨狂潮，激進組織遍地開花，有人居然瘋狂到涉嫌製造炸彈，諗住一鑊熟，難怪有人話，香港再咁折騰落去，「民主化」就冇嘞，「伊斯蘭國化」就有，到時暴力橫行，動盪不安，想唔變成第二個伊拉克都難。
所以話，政客成日話「冇民主，就冇民生」，簡直係呃鬼食豆腐。呢，政改方案被否決，社會希望休養生息，港府表示重新聚焦民生，下星期向財委會提交開設創科局撥款申請，點知激進派揚言拉布，睇怕創科局第三度闖關又係凶多吉少。太一叮想問吓反對派，乜阻撓設立創科局，搞到科技產業一籌莫展，經濟轉型苦無出路，咁就有民生咩？
舉多一個例子吖，港府今年初通過機場第三條跑道計劃，不斷遭到反對派司法覆核挑戰，連同新增兩宗個案，排住隊上庭嘅官司已經累積至四宗，咁搞法，第三跑道想如期「啟航」都難喇。港珠澳大橋之所以會面臨爛尾，正正因為當年政客慫恿市民提出司法覆核，結果搞到工程一拖再拖，嚴重延誤不特止，仲損失六十五億元添。政客為反對而反對，為阻撓而阻撓，究竟仲想靠害香港到幾時吖！
即係咁，爭取民主唔係話唔得，但前提係唔可以損害經濟民生，如果搞到香港雞犬不寧，不斷沉淪，咁就算有所謂嘅「真普選」，都毫無意義喇。唔使講其他，就講台灣吖，本來經濟繁榮，社會安定，位列亞洲四小龍之首，可惜因為政治之爭沒完沒了，藍綠陣營惡鬥不休，結果經濟不進則退，家陣嘅大學生人工依然停留喺十多年前，唔通呢啲就係大家想要嘅局面？
一句講晒，無穩定嘅社會環境，就無良好嘅經濟民生；無良好嘅經濟民生，香港就唔會有運行。政改已經曲終人散，政客固然要反省，市民亦要反思，千祈唔好將香港引入死胡同吖，叮！
