政壇：搞搞政：表決前扮啞四子多藉口

阿涂：去廁所都睇直播

阿涂係白鴿黨六個議員中唯一冇發言嘅，黨友單仲偕爆料話阿涂早已預備好發言稿，準備駁斥港澳辦主任王光亞。但人有三急，阿涂去咗廁所，返到議事廳時，政務司司長林鄭月娥已開始發言，然後好快就付諸表決。因為去廁所而無得發言，真係奇聞。

但阿涂就另有講法，話心知白鴿黨樹敵眾多，同黨友協調好要「守尾門」，以便反駁建制派抹黑白鴿黨言論。但係預計唔到建制會出乜招數，所以都打定輸數，預咗好大機會無得講。反正白鴿黨已有五個議員發言，足夠表達該黨意見喎！但係單仲偕話佢去咗廁所喎，佢就話就算去廁所都開住直播，一直監測開會情況，唔會趕唔切嘅。

KK同大舊都聲稱要「守尾門」，所以無發言。其實大舊早已帶定頭盔，早喺前日已同支持者道歉，話自己有好大機會唔可以發言。至於點解唔提出「中止待續」拖延投票，佢話都想盡快投票，避免夜長夢多。KK就解釋，想同建制派好似「打乒乓」咁，等大部分建制發咗言先講。

咁陳家洛呢？佢解釋因為氣管敏感，出唔到聲，迫於無奈要放棄發言機會喎。