政壇：至叻星：洪水橋發展 波波要醒定

發展局有意將洪水橋新發展區打造成新界西北「區域經濟及文娛樞紐」，尋日展開第三階段公眾諮詢。新增嘅西鐵洪水橋站將成市中心，附近設區域廣場、大型購物中心，連同天水圍站附近商用樓面及六間新增酒店，兩個鐵路站可提供嘅商業樓面面積等於三個太古坊或整個中環甲級商用面積。而新發展區預留咗八十七公頃作房屋用地，料可提供六萬零一百個住宅單位，幫市民置業。呢個計劃睇落好圓滿，但涉及嘅收地同安置問題唔易解決，局長「波波」陳茂波要吸取教訓，咪好似菜園村同新界東北咁，引起社會咁大矛盾同衝突，喺當前社會嚴重撕裂下，再火上加油！