喺尋日中午約十二點半，立法會陰差陽錯，提早表決政改方案，比外界預計嘅時間快咗大半日，全城愕然。不過勞工及福利局局長張建宗尋日下午三點出席一個活動時，就叻唔切自爆，話自己預咗可以如期出席活動喎，講到佢好似未卜先知咁。

張建宗出席香港無名英雄嘅頒獎禮，擔任主禮嘉賓，佢喺致辭時話，原本呢個時候，佢可能仲留喺立法會，等議員就政改質詢及表決。不過佢一早就應承出席活動，同事好擔心佢可能出席唔到，好緊張。不過，佢就認為自己實可以出席，結果證明佢嘅諗法係啱嘅喎。如果佢估嘢咁叻，咁佢應該估到政改會被否決，係咪應該勸吓政府再擇過吉日呢？

第一手消息請下載on.cc東網iPhone/iPad/Android/Windows Phone Apps