政壇：陳正欣謀內地自貿區插旗
內地今個月起大幅減關稅，又開放愈嚟愈多嘅自由貿易區，內地遊客唔使再嚟香港大舉入貨，本港一眾零售商就好頭痛。做名錶及高檔服裝生意嘅百利建集團董事總經理Daniel陳正欣一於化被動為主動，準備到深圳嘅自由貿易城設立據點。
陳正欣密謀到內地自貿區搵商機。
Daniel話香港市道低迷，暫時睇唔到曙光，除咗因為早前「驅蝗行動」趕客、多國貨幣貶值令香港嘅價格競爭力下跌之外，主因同內地密鑼緊鼓推出多個自貿區不無關係。佢又話自貿區內利用簡易進口同清關程序，商家入口貨品暫毋須交稅，消費者就每買一件，就清關報稅一件，稅率大約百分之十，比起以正常渠道入口貨品所繳交嘅稅項，便宜至少一半。
佢話呢種類似直銷嘅模式，令商家資金周轉壓力大減，消費者亦慳番唔少，可謂雙贏。所以佢正積極籌備到內地自貿區設立銷售點，擴展中檔到高消費嘅服裝生意，好過喺香港坐困愁城。
