政壇：創科局撥款打尖泛民騰雞
立法會早前通過成立創新及科技局後，政府喺下周五會就創科局嘅撥款申請，再度向立法會財務委員會闖關，同時要求財委會當日加開一節會議，令會議延長至六小時。之前都已經講過，有傳政府今次計劃會重施故技，安排創科局撥款「打尖」排喺公務員加薪、綜援「出三糧」等六項民生項目之前，藉住綑綁創科局同民生議題，慎防泛民再拉布。
（設計圖片及對白）
不過，部分泛民主派眼見區議會選舉臨近，都唔敢為咗創科局與民為敵，紛紛要求政府打消打尖念頭，以免泛民一鑊熟。
白鴿黨劉慧卿話，反對加開會議審議創科局，亦唔傾向就撥款申請拉布，希望政改否決後，其他議題可以有新開始，包括重啟政改同注重經濟民生，爭議性較低嘅民生議題，應提前處理。泛民飯盒會召集人「袋巾傑」梁家傑亦都話唔少市民等住出三糧，批評政府將市民變成人質，勒索財委會，泛民一定反對加開會議。
楊德斌做資訊科技總監
泛民有咁大反彈唔係冇理由，皆因拉布已經成為建制派打擊泛民嘅重點議題，泛民已經唔係第一次就創科局拉布，若果再就同一議題而影響出三糧等紓困措施，對年底區議會選舉肯定百害而無一利。
另一方面，政府同時宣布委任科技園首席企業發展總監楊德斌為政府資訊科技總監，下月二日履新。楊德斌來頭唔細，早喺八十年代已經發迹美國硅谷，喺當地出任硬件同軟件工程師等；九五年回流香港後，亦喺多間跨國企業同上市公司出任管理高層。
