郵政中心播病毒 隱瞞疫情佗衰家
日防夜防，家賊難防。正當全港嚴防新沙士攻破大門之際，香港郵政竟然隱瞞九龍灣中央郵件中心爆發退伍軍人症，直到被本報踢爆，先至求其向員工派發衞生署嘅宣傳單張補鑊。今時今日咁嘅防疫態度，擺明靠害啫。
係咁嘅，中央郵件中心有郵差早前確診感染退伍軍人症，衞生署喺染病郵差嘅住所及工作地點抽取水樣本，結果喺中央郵件中心不同地點抽取嘅十組水樣本之中，均驗出含有退伍軍人菌，證明惡菌遍布大樓，郵件中心變成病毒溫床，唔驚就假咯。
咁都未算，最得人驚嘅係香港郵政居然學人隱瞞疫情，一直冇向員工交代中招人數及事件詳情，搞到逾千員工人心惶惶，連水都唔敢飲。好嘞，件事尋日被本報踢爆，香港郵政冇得抵賴，惟有死死氣向員工派發單張及關閉個別洗手間，但始終無法釋除員工疑慮。
唔係員工杞人憂天o架，中央郵件中心嘅衞生情況一向麻麻，例如中心以紫外線系統消毒食水，要過濾先可飲用，點知濾芯用咗一年都冇人更換，搞到水質欠佳，員工投訴到口水乾都冇人理。家陣仲衰到爆發退伍軍人症，可見幾咁烏煙瘴氣。立法會議員就講得啱嘞，郵件中心啟用一年多就布滿惡菌，情況奇怪，反映香港郵政日常消毒工夫馬虎兒戲，根本無法保障員工健康。
大家都知，南韓新沙士疫情持續擴散，連世衞都話已經敲響警號，呼籲全球警惕。尤其係香港經歷過○三年沙士慘痛一役，更加明白防疫寧緊勿鬆嘅道理，隱瞞疫情只有死路一條。偏偏香港郵政闊佬懶理，遮遮掩掩，萬一惡菌走入社區，後果不堪設想。正所謂，禍起蕭牆，香港郵政佗衰家，就算港府防疫做得幾好都冇用喇。
冇計嘞，香港郵政管理混亂，烏龍百出，叫佢哋搞好防疫，盞嘥氣嘅啫。呢，早前審計署批評香港郵政經營不善，連年虧損，正常人都會知恥近乎勇，諗辦法改善喇，點知香港郵政淨係識斬腳趾避沙蟲，一口氣縮短近六十間郵局嘅辦公時間，你話係咪本末倒置吖。最匪夷所思係香港郵政居然充當政治打手，涉嫌違法滋擾東方報業集團，事後連半句道歉都冇，有冇再離譜啲吖。
都係嗰句，物必先腐而後蟲生。香港郵政醜聞多多，爛到入心，港府再唔出手整治，遲早累人累物嘅咋，叮！
