城中鏡：劉黃寧達喜獲三粒星

來自新加坡嘅名媛珠寶設計師Leta劉黃寧達最近好開心，因為佢居港已滿七年，兩個月前成功領取有三粒星嘅永久居民身份證，正式成為香港人。經常全球周圍走嘅Leta感慨話，香港係個福地，但係部分人士爭取激進嘅民主，導致社會嘈吵不已，籲港人應以和為貴，珍惜眼前幸福。

劉黃寧達（右）同老公劉守良係城中派對常客。

Leta話香港同新加坡雙城競爭好激烈，但近幾年香港為咗政治而虛耗，經濟發展已被星洲爬頭。不過港人仍享有比新加坡更多嘅民主自由，港人應知足咁話。

佢同埋來自馬來西亞律師世家嘅丈夫劉守良經常陪住奶奶坐郵輪遊世界，咁啱今日佢哋又舉家出發搭郵輪暢遊歐洲。佢話坐郵輪時佢特別有設計靈感，希望今趟可以激發新意念，令新嘅珠寶設計系列順利誕生。